ŠIKUTI MACHINE ON THE ROAD
Od Šikuti Machine dobili smo slijedeće obavještenje :
 ''Eko, joped niki črv u guzici nan ne da mira, pak bimo malo klatili na okoli. Pok smo pasano lito vižitali Volosko, Kanfanar, Poreč, Novigrad i Barban, vo lito bimo ubašli Pulu, Labin i Buzet.
Šikuti će u torak z večer na dvajset i tri avrila napasti i okupirati Sveučilišnu knjižnicu u Puli i to u sklopu programa Čitam ti priču- Noć knjige 2013, ke se održava u sklopu svjeckega dana libra i pravi ud autori ki pišu libre. Prežentali bi libar Darka Pekice Postelja za četiri, i unega prvega libra Savičenta in the morning. Inšoma u velikoj čitaonici sveučilišne knjižnice ćemo malo čakulati i čitati z libri. Progrm počne već ud šest a mi da bi čitali u 8 i po.
 U isten prostoru ćemo izložit osam fotografija Andija Bančića Pekine krave u krupnom kadru, kadi se vidi kako je kravan deboto liplje nego nan. Da bi rad da budu tamo misec dan pak kad se studenti dojdu vaditi neka gledaju kako imamo lipo blago.
 Kadi gredu Šikuti, gre i ništo za u kljun, pak ćemo naj kakov sirić i skute, a i za popiti će biti ku niš drugo mlika, pak vas sve lipo i drago zovemo da nan dojdete dati kuraja, kupite libar za sedandeset kunic i lipo se zabavite.'' Dorijan Vrkljan